LAOAG CITY – Pormalen a pinirmaan ni Presidente Ferdinand Marcos Jr. ti 2026 national budget nga aggatad ti Php 6.793-Trillion kalpasan ti naiget a panagadal iti nailungalong a pundo.
Inadmitir ti Presidente a sumagmamano nga items iti nailian a pundo ti vineto-na nga aggatad ti Php92.5 billion partikular iti unprogrammed appropriations.
Ti ₱6.793 trilyon a nailian a pundo ket napirmaan iti maysa a ceremonial signing iti Malacañang.
Niratipikaran ti Kongreso ti 2026 budget idi Disiembre 29, 2025 ken insigida daytoy a tiningiting ti Presidente tapno masigurado nga husto ti pananggastos ti pundo.
Basar iti Malacañang, siguradoen a maikabil ti pundo kadagiti proyekto a direkta a pakabenepisiaran dagiti umili nangnangruna iti benneg iti edukasion, salun-at ken dadduma pay a napapateg a sektor.
Naaddaan ti temporario a reenacted budget kadagiti immuna nga aldaw ti 2026 gapu ta saan daytoy a napirmaan sakbay a nagngudo ti 2025.
