LAOAG CITY – Sumuruk-kumurang a 18 a milyon a Pilipino ti manamnama a bilang ti pasyente a mairanud iti P62.6 bilyon a pondo nga inlatang ti Senado para iti zero balance billing iti amin a pampubliko nga ospital.
Iti statement, inbatad ni Senador Win Gatchalian, chairman ti Senate committee on finance, a paset daytoy ti ilunglungalong ti senado a mangipaay ti libre a panagpaagas iti amin nga ospital ti Department of Health (DOH) iti sumaruno a tawen.
Inlawlawag ni Gatchalian a P53.3 bilyon ti nailungalong a pondo iti babaen ti National Expenditure Program (NEP) para iti Zero Balance Billing (ZBB) program iti sumaruno a tawen.
Mapatta-patta nga umabot iti 16 a milyon a pasyente ti matulungan usar ti nasao a pondo.
Innayon ni Gatchalian a ti napintas a damag ket nagnayun ti komite ti P9.3 bilyon iti operating funds dagiti ospital ti Department of Health tapno matulungan ti nayun 2 a milyon pay a pasyente.
Iti babaen ti Zero Balance Billing, ibaklay ti amin a gastos dagiti pasyente a maadmit kadagiti basic wenno ward accommodations dagiti DOH hospitals.
Sakopen ti nasao a programa dagiti room charges, laboratory tests, professional fees, ken dagiti dadduma pay a magastos, aniaman ti socioeconomic status ti pasyente.
Nangilatang pay ti senado ti nayun a P1 bilyon para iti Zero Balance Billing kadagiti sumaganad nga speciality hospitals kas ti Lung Center of the Philippines, Philippine Heart Center, National Kidney and Transplant Institute, ken Philippine Children’s Medical Center.
