LAOAG CITY – Inrakurak ni Ms. Jeunesse Fronda, Nutritionist-Dietritian iti Mariano Marcos Memorial Hospital iti ciudad ti Batac a saan a makaanay iti 64 pesos a budget iti maysa nga indibiual tapno makagatang iti makan a maibilang a nasalun-at.
Daytoy ket kalpasan nga inrakurak iti National Economic and Development Authority a 64 pesos laeng iti kasapulan iti maysa a Pilipino tapno saan a maibilang a food poor.
Kinuna ni Fronda a no maibasar daytoy iti agdama a presyo dagiti magatang iti local market ket saan a makaanay gapu ta magatang ti ikan a 1 kilo iti 150 pesos, natnateng nga agbalor ti 100 pesos iti kada kilo ken 280 pesos iti karne ti baboy iti maysa a kilo.
Inpakaamona a no maibasar iti presyo ket umabot iti 33 pesos iti maysa a meal a kasapulan ngem inlawlawagna a daytoy ket presyo dagiti kangrunaan a ramen laeng ken saan pay a nairaman dagiti condiments.
Innayonna a saan met a dakes iti agtipid ngem rumbeng a saan nga isakripisyo iti nutritive value iti kanen ti tao no sadinno rumbeng nga ikonsiderar iti moderation, variety ken balance.
Kunana a saanna masinuno no mano ti rumbeng a budget ti maysa a pinoy para iti nasalun-at a taraon iti maysa nga aldaw gapo ta saan nga stable iti presyo dagiti magatang.
Kabayatanna, inpakammo ti nutritionist a ti maysa nga average adult ket rumbeng nga addaan ti plato iti makan a go, grow ken glow.
