LAOAG CITY – Umabot iti 863 a tablets nga agbalor ti 7.5 milyon a pisos ti inpaay a donasyon ti EDC Burgos Wind Power Corporation.
Inbagian ni Mr. Andy Durog, facility head ti nadakamat a korporasyon ken indauloan ni Gob. Matthew Marcos Manotoc ti gobierno probinsial a nangawat kadagiti nasao a kagamitan.
Naipaima ken ni Mrs. Miriam Ranchez, mangidadaulo ti General Services Office kenni Dr. Dany Daquioag, education consultant ti gobierno probinsial dagiti nasao a gadget.
Inlawlawag ni Durog a tablets ti inpaayda a donasyon kas paset ti Corporate Social Responsibility wenno CSR dagitoy ken kas panagresponde iti panawagan ti gobernador a panangipaay ti tulong kadagiti agad-adal ditoy probinsia.
Imbatadna a mamati ti kompania a kasapulan dagiti agad-adal ti naan-anay a tulong iti agdama a sistema ti edukasyon iti daytoy a panawen ti pandemia.
Inbunannagna a daytoy ti kaunaan a gundaway a nangipaay ti kompaniada ti tablets para kadagiti agad-adal.
Nupay kasta, impalgakna nga immun-unan a nangipaay ti kompania ti tulong para kadagiti kakailian ken para iti gobierno probinsial kas panangipamatmat ti suportada iti baet ti pandemia.
Kabayatanna, nagpanawagan ni Durog nga ipasnek ti agadal ken mausar a naimbag dagiti naidonar a tablets.
