LAOAG CITY – Adda ti pakabuklan a Php7.6-billion a balor ti inruar ti panangidaulo ti Philippine National Police para iti mid-year bonus ti dumanon iti nasurok 220 a ribu a kapulisan ita a tawen.
Basar iti Philippine National Police Public Information Office, ti nailatang iti nasao a pundo ket naibasar iti 2024 General Appropriation Act wenno national budget nga otomatiko nga in-credit kadagiti bank accounts ti eligible personnel a makaawat daytoy.
Inbatadna a ti computation ti mid-year bonus ti Philippine National Police ket katukad ti maysa a bulan a basic pay ti maysa a personnel nga addaanen ti uppat a bulan iti serbisio sipod idi Hulyo 1, 2023 agingga Mayo 15, 2024.
Mainaig iti daytoy, nagyaman ti national government ti Philippine National Police para iti agtultuloy a panagsuporta iti organisasion.
Inbatad ni Philippine National Police Chief PGen. Rommel Francisco Marbil, daytoy a mid-year bonus ket para kadagiti kameng ti nailian a pulisia ket mangipakpakita ti panangapresiar ti gobierno iti awan sarday a dedikasion ti kada pulis iti panangipatungpal dagiti responsibilidadda kangrunaannna iti panangpatalinaed iti kinakapia ken seguridad ti intero a Pilipinas.
Kagiddan daytoy, inpasingked ti hepe ti sibubukel a hanay ti kapulisan a nagtalined a committed ti intero nga organisasion iti panagprotektar kadagiti Pilipino ken nagkari a paigetanda pay ti panangipatungpal iti mandato ti sinapataanda.
