LAOAG CITY – Inpakaammo ni Mr. Marcell Tabije, mangidadaulo ti Provincial Disaster Risk Reduction and Management Office a dumanonen iti 74 a milyon a pisos ti balor ti nadadael iti benneg ti imprastraktura idinto a sumurok-kumurang maysa a milyon a pisos met ti balor ti nadadael iti benneg ti agrikultura ditoy Ilocos Norte gapu iti iduduprak ti Super Typhoon Carina.
Segun kenkuana, adda ti pakabuklan a 93 a barangay ditoy probinsia ti nakaro a naapektaran iti isasaplit ti nasao a bagyo no sadino nga adda ti 1,654 a pamilia wenno 5,355 nga indibidual ti apektado.
Inbatadna nga adda ti 42 nga evacuees a nagtalinaed pay laeng kadagiti nagduduma nga evacuation center ditoy probinsia idinto a dagiti dadduma a residente ket nakaawiden apaman a bimmaban ti danum iti lugarda.
Kunana nga adda metten ti naibunong a relief packs kadagiti biktima ti bagyo iti ili ti Pasuquin, San Nicolas, Paoay ken iti siudad ti Batac.
Mainaig iti daytoy, adda ti nairekord a maysa a pagtaengan ditoy siudad ti Laoag a partially damaged kalpasan a nagaburan ti nagreggaay a daga.
Iti agdama, makapaspasar pay laeng ti kalalainganna agingga a napigsa a tudo iti intero a probinsia ti Ilocos Norte.
