LAOAG CITY – Ginutigot dagiti labor group ti gobierno nga iyalisto nga ipasa ti linteg a mangipangato iti nationwide daily wage a P750.
Iti press conference nga indaulwan ti Bukluran ng Manggagawang Pilipino (BMP), inpetteng ti labor groups a masapol a maipangato ti minimum wage gapu iti panagngato ti presyo dagiti kangrunaan a produkto.
Inpetteng ni Bukluran ng Manggagawang Pilipino President Attorney Luke Espiritu nga agrigrigat paylaeng dagiti mangmangged ken ti kasapulan dagitoy ket ti sweldo a makabiag gapu ta ti agdama a maaw-awat da a sweldo ket inyarig da a makapatay.
Inpalgak pay ni Espiritu nga iti baet iti P40 daily minimum wage hike kadagiti empleado ti pribado a sektor iti National Capital Region (NCR) idi Hunyo ket awan ti nakita a dakkel nga epekto na gapu ta agtultuloy latta ti panagngato ti presyo dagiti mangatgatang.
Malaksid iti daytoy, ginutigot pay ti labor groups ti gobierno nga ibasura ti Republic Act No. 6727, wenno ti Wage Rationalization Act, no sadinno nga ipapaayan ti mandato ti Regional Tripartite Wages and Productivity Boards (RTWPBS) nga establisarenken urnusen ti minimum wage rates iti nagduduma a rehiyon.
Kiniddaw pay dagiti grupo iti gobierno nga urnusen ti sweldo para iti intero a pagilyan imbes a mangpanunot iti nagduduma a wagas ti panagpasweldo iti kada rehiyon.
