LAOAG CITY – Saan a dimmalan iti panangtingiting ken beripikasyon ni Department of Agriculture Secretary Francisco Tiu Laurel Jr. ti listaan dagiti farm-to-market road (FMR) projects a nairaman iti 2026 National Expenditure Program (NEP) nga agbalor ti P8.9 bilyon.
Inbatad ni Department of Agriculture spokesperson Assistant Secretary Arnel de Mesa, nagsagana ken nangisumitir ti ahensya ti baro a listaan dagiti proyekto uray saan nga inaprubaran ni Laurel, kalpasan a naipatuloden iti kongreso ti orihinal a listaan.
Kuna na a ti nabaliwan ti listaan ti Farm-to-market road projects nga agbalor ti sumuruk-kumurang nga P8.9 bilyon ket naisumitir iti babaen ti follow-up letter idi Disyembre 15, sumagmamano nga aldaw kalpasan a naaprubaran ti bicameral conference committee ti pondo dagiti proyekto idi Disyembre 13.
Inlawlawag na pay a saan nga inadal ni Laurel ti immuna a listaan gapu ta maipagarop a naka-leave ti sekretaryo idi naisumitir daytoy.
Nupay kasta, inawat ti Bicameral Conference Committee ti baro a listaan ti Farm-to-Market Road projects ti Department of Agriculture, kasukat dagiti proyekto nga immunan nga inaprubaran ti Senado ken Kamara de representantes idi Disyembre 13.
Kwinestyunaran met ni Senadora Loren Legarda no apay a saan a naipalaon iti National Expenditure Program (NEP) ken iti naaprubaran nga House General Appropriations Bill (HGAB) ti P8.9 bilyon ti Farm-to-Market Road projects.
Agamak ti senadora a ti kastoy a last-minute swapping dagiti proyekto ket mabalin a tuladen ti dadduma nga ahensya ti gobierno no mapalubusan.
