LAOAG CITY – Agarup P518.8 billion ti kiniddaw ti Department of Agriculture (DA) manipud iti Department of Budget and Management (DBM) ngem nasurok laeng a P200 billion ti nailatang.
Daytoy ti gapuna a kidkiddawen ni Camarines Sur Representative LRay Villafuerte a maipangato ti Department of Agriculture budget iti P88-billion para iti sumaruno a tawen.
Panggepna a matungpal ti gobierno ti tarigagayan a mangpuntiria iti seguridad ti taraon.
Kinuna ni Villafuerte, maragpat daytoy no adda umdas a pondo tapno maipangpangruna ti pannakaibangon dagiti irrigation ken postharvest facilities, food terminals wenno processing centers, ken Kadiwa outlets iti intero a pagilian.
Dinakamat pay ni Villafuerte ti pannakaikabil dagiti fishports ken Food Terminal Incorporated facilities ken maysa a pasilidad iti tunggal rehion, a mangtignay iti produksion ti niyog ken dadduma pay a nangato ti pategna nga apit kasta met ti livestock development.
Kabayatanna, inpakdaar ni Villafuerte a ti saan nga umdas a badyet para iti agrikultura ket mangpataud iti parikut iti suplay ken panagpresyo ti bagas, dadduma pay a produkto ti agrikultura ken mangnayon pay iti panagngato ti presio dagiti kangrunaan a tagilako.
