LAOAG CITY – Binabalaw ni Senador Robin Padilla ni Philippine Coast Guart (PCG) Spokesperson Jay Tarriela iti maipagarup a kumarkaro a “wartime propaganda” kagiddan ti kontrobersial nga AI-generated video ti China Daily a mangiladawan kadagiti Pilipino kas sunggo.
Basar iti maysa a Facebook post, inrakurak ni Padilla a ni Tarriela ti umuna a nangirugi ti riribok.
Nupay immuna a kinondenar ni Padilla ti AI video ti China Daily, inbatadna a ti panagkita dagiti puraw a kolonisador ket maipagarup nga agpapada a “sunggo” dagiti Asyano.
Kabayatanna, sinungbatan met ni Tariella ti rakurak ni Padilla ken naglikudanna a propaganda ti ar-aramiden ti Philippine Coast Guard.
Kunana a gagemda laeng ibutaktak ti maipagarup a panangriribok ti China kadagiti mangngalap a Pilipino, Philippine Coast Guard ken Bureau of Fisheries and Aquatic Resources (BFAR).
Innayonna a saanna a pulos a maawat ti pannakailadawan kadagiti Pilipino kas sunggo.
Immunan a kinondenar ti nagduduma nga opisial ti Pilipinas ti AI-generated video ti China Daily ken inawaganda kas racist ken makadadael ti ladawan kadagiti Pilipino.
Ti nadakamat a video ket nangipakita ti maysa a sunggo a nakasuot ti barong a binomba ti water cannon nga adda ti iggemna a kopya ti 2016 arbitral ruling ti West Philippine Sea.
