LAOAG CITY – Ngimmato ti net income ti Pag-IBIG Fund iti umuna a quarter ti 2026 maidasig iti kapada a panawen iti napalabas a tawen.
Ad-adda a pappapigsaen ti kabaelan ti ahensia a protektaran ti urnong dagiti miembro, makaipaay ti nalaka nga housing loan ken matulungan ti ad-adu a mangmangged a Pilipino a maaddaan ti bukud a pagtaengan.
Basar iti Pag-IBIG Fund, dimmur-as ti 11 a porsiento ti net income ti ahensia iti umuna a tallo a bulan ti 2026 ken umabot iti P16.772 bilyon.
Kunana a ti panagdur-as ti birok manpud Enero agingga Marso ket gapu iti napigsa a koleksion ken agtultuloy nga income manipud iti housing loans, short-term loans ken dagiti investment ti ahensia.
Dakkel met ti nagngatoan ti birok manipud iti investment returns nga umabot iti P3.033 bilyon wenno 51 a porsiento a nangatngato maidasig iti P2.013 bilyon idi umuna a quarter ti 2025.
Inbatad ni Department of Human Settlements and Urban Development (DHSUD) Secretary Jose Ramon Aliling nga ipakpakita ti napintas a resulta a natibker ken naurnos a kasasaad ti Pag-IBIG Fund ken nakasagana daytoy a suportaran ti gagem ni Presidente Ferdinand Marcos Jr. nga ad-adu a pamilia a Pilipino ti maaddaan ti naurnos ken nalaka a pagtaengan.
