LAOAG CITY – Aglukaten intono umay a lawas dagiti pagadalan idiay Vietnam kalpasan ti nasurok a tallo a bolan a panagserra da gapu iti covid-19 pandemic.
Daytoy ti report ni Bombo International Correspondent Cindy Molina-Relucio, taga Badoc, Ilocos Norte ngem agdama nga agtrabtrabaho idiay Hanoi, Vietnam kas English Teacher.
Inbaga ni Relucio, umabot laeng ti 271 dagiti naapektaran ti covid-19 idiay Vietnam, 232 kadagitoy ti naglaingen ken awan ti nairekord a natay.
Patien ni Relucio a nalapdan ti panagwaras ti virus iti nasao a pagilyan gapu iti alisto a panagtrabaho ti gobierno.
Inpakaammo na nga idi pay laeng umuna a lawas ti Pebrero ken awanen ti klase dagiti amin nga agad-adal, panagsardeng ti operasyon dagiti establisimiento ken nagquarantine da.
Innayon na a nalawa pay ti sakop ti Vietnam no maipanggep iti mass testing gapu ta sipud Pebrero agingga idi Abril 30 ket umaboten ti 261 ribo dagiti naipadalan iti intero a pagilyan.
