LAOAG CITY – Inrakurak ti maysa nga opisial ti Department of Trade and Industry a planoda a mangiruar inton sumaruno a bulan ti supplemental guidelines iti sertipikasion ti vape products a mailaklako iti pagilian.
Segun ken ni Trade Assistant Secretary Amanda Nograles, nailanad iti guidelines dagiti pagannurutan iti babaen ti mandatory registration ken certification ti vape products a mangrugi inton Hunio.
Kunana a nangisayangkatda ti public consultation pakaseknan iti daytoy ken kolkolektarenda laengen dagiti feedback a naawatda kadagiti stakeholder.
Inlawlawagna a dagiti pagannurutan ket masapol nangruna kadagiti vape products a saan a dimmalan iti registration ken certification ket saanen a palubusan nga i-import wenno ilako iti pagilian.
Ti Republic Act No. 11900 wenno Vape Act ket naipasa idi Hulio 2022 bayat a dagiti implementing rules and regulations daytoy ket naiparuk-at idi Disiembre ti kapada a tawen.
Iti babaen ti linteg, ti gobierno ti mang-regulate ti importasion, manufacture, panaglako, packaging, distribution, panagusar ken komunikasion dagiti device ken produkto.
Napusgan ti Department of Trade and Industry a mangsertipikar kadagiti device bayat ti responsibilidad iti pagannurutan ti consumables ket joint responsibility kaduana ti Food and Drug Administration.
Naammoan a ti Bureau of Philippine Standards ti Department of Trade and Industry ket addaan ti laboratorio idiay Cavite a kabaelanna a maka-handle ti testing procedures para iti vape device ken batteries.
Para iti vape consumables, mangnamnama ti gobierno iti accredited third-party laboratories iti panangisayangkat ti testing.
Iti napalabas a bulan, inbatad ti Department of Trade and Industry a dumanon iti 6 a milyon a pisos a balor ti uncertified vape products ti naalada sipod idi naipasa ti linteg.
