LAOAG CITY – Saan a rumbeng a pabasolen ti Philippine Atmospheric, Geophysical, and Astronomical Services Administration (PAGASA) iti kaawan ti preparasyon dagiti local government units (LGUs) iti panawen ti kalamidad, partikular iti iduduprak ti bagyo.
Inpetteng ni Senate President Francis Escudero a mabalin a maala dagiti Local Government Units ti apps tapno papigsaen ti weather monitoring ken agsagana a dagus no pumigsa ti bagyo.
Kuna na a maysa daytoy nga inpatungpal na idi gobernador paylaeng idiay Sorsogon a kangrunaan a dinuprak ti bagyo Kristine isut gapuna a saan a rumbeng a babalawen ti Philippine Atmospheric, Geophysical, and Astronomical Services Administration wenno dadduma pay a weather forecasting apps tapno maamoan ti umili ken lokal a gobierno no kasanu ti panagsagana da.
Inpetteng pay ni Escudero a trabaho ken responsibilidad ti lokal a gobierno nga amwen iti kada oras wenno minuto ti sitwasyon ti panawen.
