LAOAG CITY – Inadmitir ti Philippine Amusement and Gaming Corporation (PAGCOR) nga awan ti maaramidanda mainaig kadagiti iligal nga online gambling ditoy pagilian.
Inbatad ni Philippine Amusement and Gaming Corporation Chairman Alejandro Tengco a binulan a makaaw-awatda ti dua a ribu a reklamo iti online gambling no sadinno a 1,200 a reklamo wenno 60% ket maitudtudo nga illegal operators ti online gambling nga awan ti maaramidanda para iti daytoy.
Inlawlawagna nga awan iti charter-da ti bileg kadagiti illegal online gambling isu a manarimaan ti pannakikoordinarda kadagiti maseknan nga ahensia tapno matiliw dagiti adda iti likudan iti daytoy.
Kabayatanna, mamati ni Tengco a sigurado a bumaba ti income no bilang ikkaten ti link ti online gambling kadagiti e-wallets ngem nakasagana ti Philippine Amusement and Gaming Corporation a sumurot ken ipatungpal ti panang-delink basar iti iruar a pagannurotan ti Bangko Sentral ng Pilipinas.
Nangipeksa met ti maysa kadagiti e-wallets ti kinasagana a sumurot iti pammilin ti Bangko Sentral ng Pilipinas nga ikkaten ti link ti payment apps-da kadagiti online gambling platforms.
