LAOAG CITY – Ilunglungalong ni Nueva Vizcaya Representative Timothy Joseph Cayton ti pagsungbatan dagiti social media platforms para iti kinatalged dagiti ubbing kontra iti kinaranggas ken ti agtultuloy a pangta ti pananggundaway ken trafficking online.
Linaon daytoy ti naipila ni Cayton a House Bill No. 10760 wenno ti “Social Media Safety for Children Act,” a mangikagkagumaan a mangpilit kadagiti social media platforms a mangiyun-una iti kinatalged, kinapribado ken pagimbagan dagiti ubbing nga agus-usar kadagiti serbisioda.
Ibilin ti gakat ti pannakausar ti kangatuan a magun-od a privacy ken safety settings kas default para kadagiti menor de edad, pinaiget nga unsolicited contact manipud kadagiti adult account, ken limitaranna ti pannakaisarang iti linaon maipapan iti sexual exploitation, suicide, self-harm ken nakaro a kinaranggas.
Nakapalaon pay ditoy ti 16 a tawen ti edad a kababaan nga edad tapno maaddaanda iti bukodda a social media account nga awan ti pammalubos dagiti nagannak, idinto a kasapulan ti edad a 13 agingga iti 15 ti verifiable consent manipud iti nagannak wenno guardian.
Impaganetget ni Cayton a dakkel itan a paset ti biag dagiti annak ti internet ken social media, isu a bayat ti panangsalaknib kadakuada iti pagtaengan, pagadalan ken iti komunidad, nasken met a siguraduen a natalged met ti lubong a pagnanaedanda online.
