LAOAG CITY – Dumawdawat iti tulong ti pamilya ni Mr. Romeo Agbunag iti Barangay Bago iti ili ti Vintar kalpasan a dimmapu ti pagtaengan da gapu iti uram.
Iti eksklusibo nga innuman ti Bombo Radyo Laoag ken ni Agbunag, inpakaammo na nga adda da iti taltalon kadua na ti asawa na idi napasamak ti uram.
Kuna na nga agarup alas dies itay bigat a natan-awan na nga arig a nalawag iti batog ti pagtaengan ken naudktalan na laengen a maur-uram idi naasitgan na.
Inbatad ni Agbunag nga awan ti nakakita a dagus iti uram rason nga alisto a nagramram ti apoy ken awan ti naisalbar da nga aniaman a gamit.
Immuna iti daytoy, inpakaammo ni Agbunag nga awan ti nabati a tao iti pagtaengan da idi napasamak ti uram gapu ta intugot da iti taltalon ti maysa nga anakda idinto nga adda ti karruba ti inaudi.
Patien ni Agbunag a posible a naggapo iti beggang nga adda iti dalikan ti namunganayan ti uram.
Naamoan a ti pagtaengan ti pamilya Agbunag ket naaramid babaen kadagiti materyales nga alisto a mauram kas iti pan-aw nga atep ken kawayan idinto nga awan met ti koneksyon iti kuryente dagitoy.
Patta-patta met ni Agbunag nga umabot iti 10,000 ti total a balor dagiti nadadael iti uram.
