LAOAG CITY – Naiyuswat ti search warrant operation iti pagtaengan ni dati a Sang. Bayan Member Stewart dela Cruz iti Barangay Pacifico iti ili ti Marcos.
Segun kenni Police Captain Jonavale Maramag, ti chief of police ti PNP-Marcos, kadwa da a nangiyuswat ti operasyon dagiti kameng ti INPPO kalpasan ti naawat da a search warrant manipud iti RTC Branch 14 ditoy ciudad ti Laoag.
Nakalanad iti nasao a search warrant a maipagarop nga agik-ikot daytoy ti kalibre 45 a paltog.
Inbatad na a kabayatan ti panagsukimat dagiti otoridad ket boluntaryo nga insuko ni Dela Cruz ti dua a magazine ti kalibre 45 a paltog, walo a bala ti kalibre 45 a paltog, maysa nga holster ken maysa a box ti short firearms.
Malaksid kadagitoy ket awan met ti naala dagiti otoridad a paltog iti pagtaengan ni Dela Cruz.
Kunana nga iti compound ni Dela Cruz ket ummuna a nasukimat ti pagtaengan na ken naisaruno ti family house da ken daytoy ti ummuna a gundaway a naiwayatan ti search warrant operation ti dati nga opisyal.
Innayon na nga awan met ti report iti ili da ngem mabalin a naala ti INPPO ti intelligence report seknan iti daytoy.
