LAOAG CITY – Sinerrek dagiti agtatakaw ti pagtaengan ni Dallas Mavericks star Luka Doncic.
Basar kadagiti kapulisan ti Dallas a dumanon iti sumurok $30,000 a balor ti alahas wenno katukad ti sumurok P1.6 milyon ti naitaray dagiti agtatakaw.
Inbatad ti business manager-na a ni Lara Beth Seager nga awan ti tao iti pagtaengan ti Mavs star idi napasamak ti insidente.
Ni Doncic ti kaudian nga atleta a nabiktima dagiti agtatakaw, idi Oktubre ket sinerrek met ti pagtaengan ni Kansas City Chiefs quarterback Patrick Mahomes ken tight end Travis Kelce.
Sumagmamano nga NBA players met ti sinerrek dagiti agtatakaw kadagiti pagtaenganda kas kada Mike Conley Jr. ti Minnesota Timberwolves ken Milwaukee Bucks forward Bobby Portis.
