LAOAG CITY – Naisayangkat ti search operation iti pagtaengan ni Barangay Kawagad Amado Ibana y Agcaoili, drug surenderee iti Barangay 11, Bulbulala iti ili ti Vintar babaen iti nagtipon a pwersa PNP-Vintar, PNP-Sarrat ken INPPO.
Nakalanad iti search warrant a ti sapulen dagiti otoridad ket maysa a kalibre 38, maysa a kalibre 45 ken maysa a AK47 a paltog.
Nakumpiskar met ti search team ti dua a bala ti kalibre 38, lima a bala ken magazine ti kalibre 45 a paltog ken caliber 22 long iti mismo a sirok ti tugaw ti lugan ni Ibana.
Mainaig iti daytoy, naglikudan ni Ibana a kukua na dagiti nakumpiskar nga armas ken bala, ken saan na nga ammo no anya ti rason a naiwayatan ti operasyon.
Inadmitir ni Barangay Chairman Wyrlo Edroso iti nasao a barangay a nakigtot gapo ta maysa nga opisyal ti naiwayatan ti operasyon.
Inbatad na nga awan met ti naipalpalapayag kenkuana nga adda ti paltog ni Ibana.
Inlawlawag met ni Police Major Joseph Baltazar, chief of police ti PNP-Vintar nga inwayat da ti operasyon iti pagtaengan ni Ibana gapo kadagiti impormasyon a naawat da manipud kadagiti impormante da.
Basar iti naipadanon nga impormasyon kadakuada ket agik-ikot ni Ibana ti nagduduma a klase ti paltog ken no makainaom ket agpappaputok.
Segun kenni Baltazar, napaneknekan da pay a papaanawa ni Ibana iti lugar da rason nga ado dagiti maragsakan iti pannakatiliw na gapo ta saan da a pabor iti ar-aramiden ti kagawad.
Kunana a basar iti palawag ni Ibana ket naited nan iti sabali a tao ti kalibre 45 na a paltog ken nagkedkeden a mangipaay pay ti naan-anay a detalye.
Gapo iti daytoy, kalikagom ti PNP-Vintar a maipasubli ti nasao a kalibre ti paltog tapno saan a mausar iti dakes nga aramid.
Itii sabali a bangir, patyen ni Ibana a gapo iti innayun na a dishwashing liquid iti isbo na para iti drug test ti rason no apay a nagpositibo iti laksid a saan nga agus-usar.
Kunana na nga iti maikadwa a naisayangkat ti surprise drug test ket negatibo met ti resulta na.
Kabayatanna, innayon na a simmuko idi iti laksid nga awan ti rekord na mainaig iti iligal a droga gapo ta nairamraman laeng ken kalikagom na a madalusan ti nagan na.
Saan a makapagkomento ni Baltazar iti rakurak ni Ibana a gapo iti nailaok a dishwashing liquid iti isbo na ti rason no apay a nagpositibo iti drug test iti kallabes.
iti agdama ket maisagsaganan ti kaso kontra iti nasao a kagawad.
