LAOAG CITY – Sinerrek ti saan pay a nabigbig a suspek ti pagtaengan ti maysa a baket iti Barangay 1, Valdez iti ciudad ti Batac.
Binigbig ni Police Captain Johnwen Balueta, chief of police ti PNP-Batac ti biktima a ni Mrs. Paz Cocson y Saliling, agtawen ti 89, naasawaan ken residente iti nasao a lugar,
Segun kenni Balueta, maibilang a robbery incident ti napasamak gapo ta inranta ti suspek a dinadael ti tawa ti balay ni Cocson ken intaray na ti maysa a paris ti aritos ken maysa a singsing.
Malaksid iti daytoy, basar iti palawag ni Cocson ket maipagarop a tinutukan pay isuna ti suspek ti bassit a paltog sakbay a naglibas.
Ummuna iti daytoy, itay laeng 12:45 ti parbangon ket nadlaw ti biktima a naserrek ti pagtaengan na ken ditoy a nakita na ti nakamaskara wenno nakaabungot a suspek.
Inadmitir ni Balueta a marigatan da a mangdeterminar iti suspek gapo ta nakaabungot ngem ikarigatan da a bigbigen babaen iti panang-review da kadagiti CCTV.
Kabayatanna, ad-adalen ti PNP-Batac no adda ti koneksyon daytoy iti panagtatakaw met laeng iti nadakamat a barangay kangrunaan iti pagtagilakoan ti empenada itay kallabes.
