LAOAG CITY – Inlawlawag ni Mrs. Mercy Abara iti Barangay Calayab ditoy ciudad ti Laoag nga adda da iti ruwar ti balay da idi timmama ti paltog iti galba ti akinsango a kwarto ti pagtaengan da ken simmalput iti bobeda.
Nupay kasta, inbatad na nga awan met ti natamaan iti nasao a naiwawa a bala.
Patyen ni Abara nga aggapo iti firing range ti nakita ti asawa na a buli.
Kabayatanna, kuna ni Mr. Chester Tolentino, chief tanod iti nasao a baranagay nga apaman a naamoan na ti pasamak ken intawag na iti PNP.
Mamati met daytoy nga aggapo iti firing range ti naiwawa a bala ken daytoyen ti maikatlo a gundaway a napasamak ti nasao ng insidente.
Kabayatanna, nagsango para iti dayalogo ti Marcos Combat Shooters ken dagiti maseknan iti nasao a barangay mainaig iti pannakatama ti maysa a pagtaengan babaen ti naiwawa a bala.
Daytoy ti kinumpirmaran ni Police Lt. Col. Amador Quiocho, chief of police ti PNP-Laoag.
Segun kenni Quiocho, nagpasasaritan ti napasamak a pannakatama ti bala ti paltog ti galba ti maysa a pamilya kabayatan ti aktibidad ti Marcos Combat Shooters.
Inlawlawag na a binayadan ni Mr. Ryan Remigio, presidente ti Combat Shooters ti naperdi a galba ti pagtaengan.
Inbatad na anagkari pay dagiti maseknan nga ikkaten da ti plate nga agturong iti Barangay Calayab tapno saanen a maulit ti pasamak.
