LAOAG CITY – Kiniddaw ni Dr. Euphemia Delos Santos a maiyakar ti shooting-firing-range iti Brgy. Calayab ditoy ciudad ti Laoag tapno maliklikan iti anyaman a trahedya.
Daytoy ket kalpasan a nagturong iti mismo a pagtaengan da Dr. Delos Santos ti naiwawa a bala manipod iti shooting-firing-range.
Rumrumuar a maipagarop a Cal. 9 MM ti narekobre a bala manipod iti pagtaengan ni Delos Santos.
Nupay kasta, saan a makapagimbestigar a naimbag dagiti kameng ti PNP-Laoag gapu ta saan a maibaga ti maseknan no kaano a napasamak ti pannakatama ti balay da babaen ti naiwawa a bala.
Segun kenkuana, saan dan nga urayen nga adda dagiti madangran pay gapu ta saan da met a maatipa dagiti maiwawa bala iti lugar da.
Kunana nga agamak dagiti residente iti lugar sipod idi naipasdek ti nasao firing range kangrunaan na ket adu dagiti ubbing iti nasao a barangay.
Mangnamnama ni Dr. Delos Santos a patgan kuma iti agtagikua ti kiddaw da a pannakaiyakar ti nasao a shooting-firing-range iti lugar.
