LAOAG CITY – Inlawlawag ni Mr. Roderick Menor ti sitwasyon ti mairekreklamo a pagtaraknan na ti baboy gapo iti maipagarop a nabangsit nga angot iti Barangay San Pablo iti ili ti San Nicolas.
Daytoy ket kalpasan nga adda ti naipadanon iti Bombo Radyo Laoag a reklamo seknan iti maipagarop a nabangsit nga angot nga aggapo iti ubong iti taraken na a baboy.
Segun kenni Menor, inaldaw na a dalusan ti ubong dagiti taraken na a baboy ken patien na a saan a gapo iti daytoy ti nabangsit nga angot nga irekreklamo dagiti kabarangayan na.
Inpetteng pay ni Menor a gapo iti naglabas a panagtudtudo ket sigurado a napilot ti dagdaga ken daytoy ket awan ti maaramidan na.
Inbatad na ti daga nga ayan ti ubong ti baboy na ket kabakiran nga isu ti patien na a rason nga adda ti maipagarop a nangisit a kolor na a danom a maiyanod.
Naamoan a ni Menor ket addaan ti 12 a fattening malaksid laeng kadagiti 12 a burias.
Inadmitir pay ni Menor nga awan ti septic tank ti pagtaraknan na ti baboy ngem inpasigurado na a saan a mais-istimar a nasayaat ti rugit dagiti baboy na.
Kabayatanna, inpasigurado ni Menor a nakasagana a mangsurot no anya ti maibalakad kenkuana para iti pagsayaatan iti amin.
Inbatad ni Barangay Chairwoman Marilyn Ulep iti Barangay San Pablo iti ili ti San Nicolas nga awan pay ti naidanon kenkuana a report mainaig iti nabangsit nga angot a maipagarop nga agappo iti pagtaraknan ti baboy ni Mr. Roderick Menor.
Segun kenni Ulep, ti lugar a pagtartaraknan ti baboy ni Menor ket igid ti taltalonan rason nga awan met dagiti nagreklamo.
Inlawlawag na nga iti barangay da ket maipalubos nga agtaraken ti maysa nga indibidual ti nasurok a lima a baboy no laketdi awan ti maapektaran na a pagtaengan.
Mainaig iti daytoy, kunana a maibalakad ti kaadda ti septic tank ti pagtaraknan ti baboy.
