LAOAG CITY – Mairekreklamo ti ubong ti baboy ni Barangay Chairman Marconi Mariano iti Barangay 14 ditoy ciudad ti Laoag nga adda iti Barangay Pila gapo iti nabangsit nga angot.
Segun kenni Barangay Chairwoman Erlinda Foster iti Barangay Pila, kinasarita nan a personal ni Mariano ket naipasigurado kenkuana nga awanen ti problema.
Nupay kasta, napaneknekan ti team ti Bombo Radyo a pudno nga adda ti madi nga angot manipud iti ubong ti baboy nga isu ti kangrunaan pay nga irekreklamo dagiti bumarangay.
Inbatad na a tapno agsardeng ti reklamo ket rumbeng kuma a madalusan wenno masolusyunan daytoy.
Naamoan nga umabot iti nasurok 20 a baboy pakairamananen ti uppat a pagganakan ti taraken ni Kapitan Mariano.
Rumrumuar a nabayagen nga adda ti taraken ni Mariano ken dimmanon kenkuana ti reklamo, addan ti makalawas ti napalabas.
Mainaig iti daytoy, nagpadespensar ni Kapitan Mariano iti madi nga angot ti pagtaraknan na ti baboy kageddan ti panangibaga na a maawatan na ti marikrina dagitoy.
Inlawlawag na nga adda ti septic tank ti ubong na, ken idi saan a panagtutudo ket palaen na ken ibilag na dagiti rugi ti baboy.
Nupay kasta, kunana a pinagtutudo ita isut gapo na nga isu ti paggapoan ti madi nga angot.
Dinakamat na a naganak dagiti taraken na a baboy, ken gapo iti ASF ket awan ti aggatang ti burias isut gapo na a tinaraken na pay laeng dagitoy.
Kunana a gapo iti reklamo ket ikabil na amin iti septic tank ti rugit ti baboy na ken no mapunno ket ipa-drain na ti septic tank partikular intono napintas ti paniempo wenno saan a panagtutudo.
Inpasigurado ni Mariano nga intono malako na dagiti burias na ket ibasbasit nan ton dagiti taraknen na a kas iti dati.
