LAOAG CITY – Naiget ti panagsagana ti ili ti Pagudpud ti mapaspasangasangan a panaglukat ti turista iti rehiyon uno pakairamamanan ti Ilocos Norte ken nakibinnuligan iti ciudad ti Baguio.
Nagyaman met ni Mayor Rafael Benemerito iti suporta nga ipapaay ti gobierno probinsyal kadakuada iti babaen ti liderato ni Gov. Matthew Marcos Manotoc.
Inbatad a kangrunaan nga isagsaganan da ket dagiti establishimento nga adda ti pakainaigan na iti turismo nangruna kadagiti resorts ken home stay.
Inlawlawag na a naipagunam-gunam kadagiti maseknan pakairamanan dagiti tricycle drivers ti panangsurot da kadagiti protocols ken pagannurutan iti pananglaban iti covid-19.
Kunana nga iti ummuna nga aldaw a pannakalukat ti turismo ket saan pay laeng a karaman dagiti home stay ken dagiti tricycle.
Segun iti Mayor, basar iti napagtutulagan ket agpatingga iti 50 ti bilang dagiti turista a mapalubusan nga aggigiddan a sumrek.
Innayon na a babaen iti daytoy ket masigurado a saan nga agdudupudop dagiti turista iti maysa a lugar.
Malaksid iti daytoy, inulit ti mayor ti pammasingked ti gobernador iti ummuna a gundaway a dagiti laeng negatibo ti resulta ti RT-PCR test wenno antigen test ti mapalubusan a sumrek ken masapol a nakarehistro da iti Provincial Tourism Office wenno organisado a grupo.
