LAOAG CITY – Inlawlawag ni Engr. Fehlander Madriaga, ti dati a provincial director ti DOST ti usar ti solar power plants ken windmills ditoy probinsya.
Segun ken ni Madriaga, umabot iti 250 megawatts ti ma-generate ti windmills babaen iti napigsa nga angin ken makaanay a mangsuplay iti kasapulan a kuryente ditoy probinsya.
Nu pay kasta, inbatad na nga arig a saan a marikna daytoy ditoy probinsya kangrunaan iti serbisyo ti Ilocos Norte Electric Cooperative (INEC) gapu ta saan nga agderetso iti kooperatiba ti ma-generate ti windmills ngem ketdi iti National Grid Corporation (NGCP) ken isu ti mangilako ti nagenerate a megawatts.
Mainaig iti daytoy, inlawlawag ni Madriaga nga iti sistema ti windmills ket nangato ti ma-generate na no ikompara iti INEC isut gapu na a masapol a maipan iti dakdakkel a substation ken isu ti mangibaba ti boltahe a mailebel iti kabaelan ti kooperatiba.
Kabayatanna, inbatad ni Madriaga a mabalin a direkta a sumrek iti INEC ti ma-generate a power manipod iti windmills ngem narigat ti proseo ken posible a daytoy pay ti mangitunda iti ad-adda a nangina a singir ti kuryente.
Immunan nga inpakaammo na a ti ma-generate ti windmills ken solar power plants ditoy probinsya ket maisuplay amin iti Luzon grid ken saan laeng a ditoy probinsya.
