LAOAG CITY – Nagtulag ti gobierno ti Pakistan ken Taliban iti pannakaipatungpal ti “immediate ceasefire” kalpasan ti nasurok a maysa a lawas a nadara a rinnupak.
Daytoy ti kinumpirmaran ti foreign ministry ti Qatar, kalpasan ti naisayangkat a dayalogo kadwa da ti Turkey no sadinno nga imannugot ti dua a partido iti pannakaestablisar ti mekanismo tapno mapatibker ti manayun a kapia ken kinatalged.
Mainaig iti daytoy, inbatad ti pannakangiwat ti Taliban a ni
Zabihullah Mujahid, ti panagpatingga ti “hostile actions” ket nakapatpateg idinto nga inawagan met ti foreign minister ti Pakistan a ti katulagan nga umuna nga addang para iti umiso a direksyon.
Maipalagip nga agpada ti Pakistan ken Taliban a mangibagbaga nga ado dagiti nagbalin a casualties kadakuada kabayatan ti rinnupak, ti maibilang a kagrabean a panaglalaban sipud nagsubli ti Taliban iti turay idi 2021.
Nabayagen nga ak-akusaran ti Islamabad ti Taliban a mangsalsalaknib kadagiti armada a grupo a mangisaksaknap ti panagatake iti Pakistan, banag a naglikudan met ti Taliban.
