LAOAG CITY – Kuarta ken relief packs dagiti ipapaay a tulong ti Filipino Community kadagiti residente a naapektaran ti layus idiay Pakistan.
Daytoy ti kinumpirmaran ni Mr. Syed Moiz Shah, iti Defence Residents Social Welfare Association, maysa kadagiti tumultulong kadagiti residente a naapektaran ti nakaru a layus iti nasao a pagilian.
Iti eksklusibo a pannakiinuman ti Bombo Radyo Laoag kenni Shah, naggapu dagiti naapektaran a residente kadagiti lugar nga adayo kadagiti siudad no sadinno a nalayus.
Kuna na nga agpaspasar ti sakit dagiti naapektaran Pakistani gapu ti in-inomen da a danum manipud iti bito ken agsakit da pay gapu kadagiti kagat ti lamok.
Inadmitir ni Shah nga agkurkurang ti agas ken dadduma pay a kasapulan dagiti nagbakwit kn mangnamnama da ti international aid.
Kabayatanna, kinumpirmaran pay ni Shah a nagtalinaed a natineo dagiti pagtatalonan kadagiti barangay iti Pakistan ken nadadael dagiti kangrunaan a mula da kas iti kapas, trigo ken dadduma pay a pangal-alaan da ti pagbiag.
Innayon ni Shah a possible nga umabot iti sumagmamano a bulan sakbay nga ages-es ti danum iti agarup kagudua a nalayus iti nasao a pagilian.
Awan met dagiti Pilipino a naapektaran ti layus gapu ta agtrabtrabaho dagitoy kadagiti siudad a saan a madanun ti danum.
