LAOAG CITY – Inpanakkel ni Barangay Kagawad Jojo Cumlat iti Barangay Abkir iti ili ti Vintar nga umad-adon dagiti gumatgatang kadagiti ar-aramiden da a tsinelas.
Kuna na a dumandanon payen dagiti produkto da agingga iti Metro Manila, ken mangnamnama a kadagiti sumarsaruno a bolan ket makailako da payen iti ballasiw taaw.
Inlawlawag na a malaksid iti tsinelas ket isaruno danto metten ti agaramid ti sapatos ken dagiti sandals.
Nagyaman ti barangay kagawad ken ni Mayor Richard Degala iti ili ti Vintar gapu ta napili da ti barangay da a pakaipatakderan ti paktorya ti tsinelas ken sapatos.
Innayon na a saan laeng nga isuda a residente iti nasao a barangay ti mabenbenepisyaran iti daytoy gapu ta adda da met dagiti taga sabali a lugar a kadwa da a dimmalan ti panagsanay para iti panagaramid ti tsinelas.
Kabayatanna, inbatad ni Cumlat a saan a nalaka ti agaramid ti tsinelas gapu ta ti maysa laeng a pares ket ado da a manggamulo iti daytoy.
