LAOAG CITY – Temporario a sinuspenso ti flag carrier a Philippine Airlines ti sumagmamano a biahe daytoy nga agturong iti Middle East pakairamanan dagiti ruta idiay Dubai ken Doha gapu iti kumarkaro a tension iti rehion.
Basar iti mangidadaulo ti eropuerto, karaman iti naapektaran a flights ti PR 658/659 (Manila–Dubai–Manila), PR 684 (Manila–Doha) ken PR 685 (Doha–Manila) kasta pay ti nayon a pannakakanselar ti PR 685 nga orihinal a naikeddeng inton Mayo 1.
Inlawlawag ti Philippine Airlines a daytoy nga addang ket gapu iti agdama a situasion ti sumagmamano a paset ti Middle East tapno masigurado ti kinatalged dagiti pasahero, crew ken dagiti eroplano dagitoy.
Nangidiaya ti Philippine Airlines para kadagiti naapektaran a pasahero kadagiti opsyon kas ti libre a rebooking no nagsubli dagiti biahe, conversion ti tickets into travel credits wenno full refunds maiyallubog kadagiti pagannurotanda.
Daytoy nga addang ket paset ti nalawlawa a pannakapasayaat kadagiti airline iti intero a lubong a naapektaran iti gubat idiay Middle East nga agtultuloy a makaap-apektar ti sumagmamano nga international flight routes ken operations.
