LAOAG CITY – Pinaneknekan ti homeless man idiay Amsterdam, Netherlands a pudno ti pagsasao nga “honesty is the best policy” gapu ta nakaawat daytoy ti dakkel a gungguna kalpasan nga inpulangna ti napidutna a wallet a naglaon ti 2,000 euros.
Addan ti sumurok-kumurang dua a tawen a palaboy ti agtawen iti 33 a ni Hadjer Al-Ali iti Amsterdam. Tapno adda ti pangalaanna a panggastos iti inaldaw-aldaw, agpidpidut isuna kadagiti nakairawang a plastic a bote iti maysa a train station. Ikabkabilna dagiti mapidpidutna iti maysa a recycling machine kasukat ti sumagmamano laeng a barya.
Maysa nga aldaw kabayatan ti panagpidutna ti bote iti maysa a nakaparada a tren, adda ti napidutna a wallet a naglaon ti 2,000 euros.
Inbatad ni Hadjer, saanna a napanunutan a tagikuaen daytoy ken kalikagumna a maisubli ti akinkukua ti nasao a wallet.
Inkabilna iti police station ti wallet ngem gapu ta awan ti nagianna nga ID wenno aniaman a mabalin a pakabigbigan ti akinbagi ket kinasapulan pay nga agpanawagan iti online ti Amsterdam police tapno mabirukan ti akinkukua iti daytoy no sadino naikkan ti gungguna ni Hadjer ti 50 euros a voucher.
Malaksid iti daytoy, adda ti naiyuswat nga online fundraising para kenkuana a dimmanon iti 34,000 euros ken adda pay ti mangididiaya kenkuana a trabaho.
