LAOAG CITY – Impasigurado ti Malacañang ti sibubukel a talekda iti Philippine National Police (PNP) kageddan ti rakurak ni Vice Presidente Sara Duterte nga awan ti talekna kadagiti kapulisan.
Segun ken ni Palace Press Officer Claire Castro, araramiden ti Philippine National Police (PNP) ti responsibilidadda a maitunos iti linteg, awan ti pabpaboranda ken awan ti maris pulitikana.
Kuna pay ni Castro nga agtalinaed a propesional dagiti pulis iti panangpatalged iti karebbengan dagiti amin nga umili nga adda iti proteksion da.
Ginutigot met ti Palasyo ti siasinno man nga agreklano iti tignay ti pulisa nga ipadalan daytoy iti legal a proseso imbes nga agpabasol nga awan ti umno a pagibasaran.
Impetteng pay ti palasyo a saan da nga ipalubos a mausar ti kapulisan kas armas iti aniaman a kinaranggas.
