LAOAG CITY – Nairubuat iti Laoag City Commercial Complex ti Palengke QR PH Plus, ti programa a pagbinbinnuligan ti Bangko Sentral ng Pilipinas ken ti Department of Interior and Local Government.
Mainaig iti daytoy, impadanon ni Gob. Matthew Marcos Manotoc ti napalaus a panagyamanna ken ni Bangko Sentral ng Pilipinas Gov. Eli M. Remolona, Jr. kangrunaanna ken ni Bangko Sentral ng Pilipinas Deputy Gov. Bernadette Romulo Puyat a nagatendar a mismo iti daytoy nga aktibidad ken dagiti dadduma pay nga opisial ti Bangko Sentral ng Pilipinas.
Inlawlawagna a dakkel a tulong kadagiti umili ti pannakairubuat ti nasao a programa ditoy probinsia gapu ta masapul nga arakupen ti baro a teknolohia pakairamanan ti electronic-payments.
Segun kenkuana, malaksid iti mabalin nga igagatang kadagiti produkto a kayat a gatangen nga uray awan ti ig-iggaman a kuarta, eksakto pay ti maibayad, adda nalawag a pakakitaan iti nagasto ken masigurado ti seguridad agsipud ta maliklikan ti mabalin a pannaka-biktima dagiti mannipdot.
Inkari ti gobernador ti naan-anay a suporta ti gobierno probinsial iti daytoy a programa ti Bangko Sentral ng Pilipinas.
Namnamaen na nga ad-adu pay dagiti programa ti Bangko Sentral ng Pilipinas a pakibinnuligan ti probinsia a mangipaay ti positibo nga epekto kadagiti umili.
Kabayatanna, impeksa ni Puyat ti panagyamanna iti gobernador gapu ta idi pay Marso 20 iti napalabas a tawen nga adda ti inaprobaran ti Sang. Panlalawigan a resolusyon para iti pannakibinnulig a mangadaptar iti “cashless payments”.
Inpakaammo na a nakadependar ti panagballigi ti nasao a programa iti panangitandudu dagiti Local Government Units.
Mainaig iti daytoy, mamati ni Gob. Marcos Manotoc nga iti kaadda dagiti sumagmamano a mayor iti pannakairubuat ti nasao a programa ditoy probinsia ket namnamaenna a maitandudu daytoy kadagiti dadduma pay nga ili pakairamanan ti siudad ti Batac.
Karaman kadagiti mayor a nagatendar iti nasao a programa ket isuda Mayor Albert Chua ti siudad ti Batac, Mayor Nicomedes de la Cruz ti ili a Bacarra, Mayor Shiela Galano ti ili a Paoay ken Mayor Angel Miguel Hernando ti ili a San Nicolas.
