LAOAG CITY – Nagpanawagan ni Palestinian President Mahmoud Abbas iti naan-anay a panaglippas ti gubat iti Gaza.
Iti video message na iti United Nations General Assembly (UNGA), kunana a nasken nga agtitinnulong dagiti pagilyan tapno maisardeng ti ar-aramiden a genocide ti Israel.
Malaksid iti daytoy ket mangitunda pay iti panagbisin, pannakadadael ken pannakapukaw ti pagtaengan dagiti Palestino iti Gaza.
Inpetteng na nga awan ti hustisya no saan a mawaya-wayaan dagiti Palestino.
Kunana a nakasagana a makitinnulong iti US, Saudi Arabia, France ken UN tapno maipatungpal ti peace plan iti Gaza.
Iti napalabas a lawas ket inyendorso ti 193 member ti UN General Assembly ti pito a panid ti deklarasyon a gagem na a maaddaan ti two-state soluiton para iti Israel ken Palestinian tapno malpasen ti gubat iti nagbaetan ti Israel ken Hamas iti Gaza.
Inlawlawag na nga awan ti papel ti Hamas iti panagturay no sadinno isuko da dagiti armas da iti Palestinian authorities.
Maipalagip a nag-video message laengen ti Palestinian leader kalpasan saan a pinatgan ni President Donald Trump dagiti lider ti Palestine ti US Visa da tapno makaatendar iti tinawen nga UN summit idiay New York.
