LAOAG CITY – Naragsak nga inpakaammo ni Brgy. Chairman Joe Nixon Quitoras ti Brgy. Capurictan iti ili ti Solsona ti pormalen a pannakairubuat ti Palit Basura Program iti barangayda.
Segun kenkuana, dagiti residente ket mabalinda nga ipasukat dagiti naurnongda a basura kas ti plastic iti barangayda kadagiti grocery items.
Inbatadna a ti pundo a mausar ket mismo iti bukud a bulsa dagiti kakaduana nga opisial ti barangay.
Kunana a dagiti makolektarda a basura ket maipan ken mailako met laeng iti junkshop.
Inlawlawagna a gagem ti nasao a programa tapno ad-adda pay nga igaed dagiti kabarangayanna ti agdalus nangruna ket naiget ti panangitandudoda iti pannakatagiben iti aglawlaw.
Kabayatanna, naammoan nga addan dagiti pammadayaw a naawat ti Brgy. Capurictan iti ili ti Solsona maipapan iti kinadalus iti maysa a barangay.
