LAOAG CITY – Manamnama a maiwayat iti kabiitan a panawen ti programa ti Liga ng mga Barangay a “Palit sa Basura”.
Daytoy ket babaen iti pannakibinnulig da iti Environment and Natural Resources Office iti gobierno probinsial.
Segun ken ni Liga ng mga Barangay President Ryan John Pascua, kalikagum da nga adaptaren ti programa ni Environmental Program Officer Jogie Jimenez idi agserserbi paylaeng kas Barangay Chairman.
Patien ni Pascua a babaen iti nasao a programa ket malapdan ti panagadu ken basta lattan pannakaiwarang dagiti basura, ken masursuro dagiti umili ti mangtaripato iti aglawlaw.
Immunan a nadakamat nga iti ili ti Pasuquin, kangrunaan na iti Brgy. Caruan ti umuna a pakaiwayatan ti nasao a programa, ken sumarunon to dagiti dadduma pay lugar ditoy probinsia.
Innayon ni Pascua nga idi kuma paylaeng a naiyimplementar ti programa ngem naabutan daytoy ti election ban.
Kabayatanna, inpakaammo ni Pascua a dagiti basura ket mabalin a maisukat iti grocery item, school supplies ken gamit iti pagtaengan.
