LAOAG CITY – Naalarma dagiti tattao pakairamanan dagiti otoridad iti maipagarup a bomb threat iti maysa a Bingo Amusement iti Brgy. 19 ditoy siudad ti Laoag.
Segun ken ni PLt. Col. Mar Louise Bondoc, ti hepe ti PNP-Laoag, maysa a text message ti naawatda iti agarup alas otso idi rabii pakaseknan ti maipagarup a pannakaimula ti bomba iti nasao a pasdek.
Gapu iti daytoy, kuna na a dagus a nagreposponde dagiti otoridad pakairamanan dagiti kameng ti Ilocos Norte EOD K9 Unit, DPS, paramedics ken BFP.
Nu pay kasta, inbatad na a bayat ti pananginspeksyon da iti lugar agingga iti oras ti alas dyes ket awan ti nakita nga aniaman a klase ti naimula a bomba.
Kuna ni Bondoc maibilang a prank wenno nangluko laeng ti nangipatulod ti mensahe mainaig iti maipagarup a pannakaimula ti bomba.
Inpakaammo na nga iti agdama ket manarimaan ti panangimbestigar dagiti otoridad iti agtagikua ti cellphone number a nangipatulod ti mensahe.
Innayun na a nu maduktalan ti adda iti likudan daytoy ket mapatawan ti umiso a pannusa.
Nagballaag ni Bondoc iti umili a maisardeng ti pananglukluko ken panangipatulod ti palso nga impormasyon iti kapulisan nanruna nu makaitunda ti nakaro a panagamak ti publiko.
