LAOAG CITY – Positibo ti resulta ti naiserbi a dua a search warrant operation gapu iti panaglabsing ti Republic Act (RA) 10591 ken Republic Act (RA) 9165 iti pagtaengan ti maysa a tricycle driver iti Barangay 9 iti ili ti San Nicolas.
Nabigbig ti subject iti operasyon a ni Mark Robin Asuncion, agtawen ti 24, addaan ti live-in partner, tricycle driver ken residente iti nadakamat a barangay.
Iti panagsukimat dagiti kameng ti Philippine National Police (PNP) iti pagtaengan ni Asuncion, nakakumpiskar da ti sumagmamano a sachet a naglaon ti maipagarop a shabu, drug paraphernalia ken maysa a kalibre 38 a paltog nga addaan ti sumagmamano a bala.
Segun ken ni Asuncion, immunan a natiliw idi 2016 no sadinno nga agtawen ti 17 iti drug buy-bust operation ngem na-acquit ti kaso na.
Inpetteng ni Asuncion a sakbay ti operasyon ket maipagarop nga adda ti uppat nga indibidual nga immuna a simrek iti pagtaengan da.
Nagbalin nga emosyonal ni Asuncion kabayatan ti panangibaga na a nabayagen nga insardeng na ti agusar ti illegal a droga no sadinno a ti naudi ket idi pay 2016.
Kuna na pay nga uray ti panaginom ti nasanger ket insardeng nan.
Inpasingked na a saanna a bagi dagiti naala nga ebidensya iti uneg ti balay da kontra kenkuana.
Kabayatanna, inpasingked ti ina ti subject ti operasyon a ni Mrs. Marilous Asuncion a masdaaw da iti naiyuswat nga operasyon idinto a nabayagen nga insardeng ti anak na iti illegal nga aktibidad na kangrunaan na ti panagusar ti illegal a droga.
Mainaig iti daytoy, uray ni Barangay Kagawad Manuel Aninag ket masdaaw iti pannakatiliw ni Mark Robin Asuncion gapu ta ti ammo na ket naminpinsanen a tinallikudan na ti madi nga aramid na sipud pay idi 2016 nga immuna a pannakatiliw na gapu iti illegal a droga.
Innayon na nga awanen ti mamonmonitor da nga illegal nga aktibidad na ngem no bilang sinublianan na ket masapol nga ikaro na ti nagbasulan na.
