LAOAG CITY – Positibo ti nagbalin a search warrant operation dagiti kameng ti PNP-Marcos ken 2nd Ilocos Norte Provincial Mobile Force Company iti INPPO iti pagtaengan ni Barangay Kagawad Joel Pitpit iti Sitio 3, Sto. Tomas, Barangay Santiago iti ili ti Marcos.
Ummuna iti daytoy, inyuswat dagiti otoridad ti operasyon ken nakalanad iti search warrant nga agik-ikot ni Pitpit ti kalibre 45 a paltog, caliber 9MM ken balbala.
Segun kenni Police Major Jayson Batuyong, OIC ti 2nd Ilocos Norte Provincial Mobile Force Company, inpadanon kenkuana dagiti simrek iti uneg ti pagtaengan ni Pitpit a nakaala da ti paltog ken eksplosibo.
Kabayatan ti panagukag dagiti otoridad ket adda ti naala da a maysa a kalibre 45 a paltog ken lima a bala na, bala ti M203, maysa a magazine ti kalibre 45 a paltog nga addaan ti lima a bala ken riffle grenade.
Inlawlawag na a basar iti nabayagen a panagmonitor dagiti otoridad ket adda ti report nga adda ti ikot ni Pitpit a paltog nga isu ti nangitunda ti panagaplikar da ti search warrant agingga a naisayangkat ti operasyon.
Inpetteng na a ti akusasyon nga adda ti simrek a pulis sakbay ti pannakaiyuswat ti operasyon ket sungbatan da iti korte.
Naiget met a naglikudan ni Pitpit nga adda ti ikot na a paltog ken eksplosibo ken ammo na a maiparit ti agikot kadagitoy.
Inakusaran ni Pitpit a sakbay a nangrugiti pormal a panagsukimat dagiti otoridad ket adda ti maipagarop a simrek a pulis iti kwarto dagiti menor de edad nga annak na ken riniing da dagiti ubbing.
Malaksid iti daytoy, inpetteng pay ni Pitpit nga idi mapan iti main house da a naggapo iti ipapaaramid na a kwarto ket maipagarop pay nga inparit dagiti pulis a sumrek daytoy ken inrikep da pay ti ridaw.
Inpeksa pay ni Pitpit ti luksaw na kadagiti search team gapo iti maipagarop a panangimula da kadagiti nakumpiskar a paltog ken eksplosibo.
Inlawlawag na pay a no pudno nga adda ti ikot na nga eksplosibo ken paltog ken saan na nga ilemmeng iti kwarto dagiti annak na gapo ta ammo na a delikado daytoy nangruna no inay-ayam dagiti ubbing.
Mainaig iti daytoy, inlawlawag ni Barangay Chairwoman Normalyn Bayudan iti Barangay Santiago iti ili ti Marcos a nasayaat a tao ken kas maysa a Kagawad ni Joel Pitpit, ti subject ti naiysuwat a search warrant operation.
Segun kenni Bayudan, sipud nagtugaw isuna kas kapitan ken sipud nagbalin a konsehal ni Pitpit ket awan pay ti nakaidamdamagan wenno nakaibabainan daytoy iti barangay da.
Kunana a nakigtot isuna idi nakita na nga adda ti paltog nga adda iti karton a paglupotan dagiti annak ti kagawad.
Inbatad na a basar kadagiti annak ni Pitpit ket maipagarop a dagiti pulis ti nangriing kadagitoy ket naimatangan a mismo ti katugangan na a lalaki a ni Mr. Plasi Donebris.
Mainaig iti daytoy, kinumpirmaran met ni Donebris nga adda ti dua a pulis a simrek ngem saan na a nalasin gapo ta nakaabungot dagitoy.
Inlawlawag na a maipagarop a ginuyod dagiti pulis isuna nga inruwar ken simrek da iti kwarto dagiti ubbing.
Inbaga pay daytoy a saan pay a nagkatok dagiti pulis no diket basta da lattan a simrek iti balay da ken nagdiretso iti kwarto.
