LAOAG CITY – Inbatad ni Police Captain Joseph Tayaban, chief of police ti PNP-Badoc a balligi ti naiyuswat a search warrant operation iti Barangay Pagsanahan iti nasao nga ili.
Ti natiliw ket agtawen ti 35, naasawaaan, maysa a mangalap ken residente iti nasao a barangay.
Segun kenni Tayaban, ti operasyon ket naisayangkat babaen ti nagtipon a pwersa ti PIU-INPPO, PNP-Badoc, 2nd PMFC, Maritime group ken RA RID iti pagtaengan ti subject.
Ti search warrant ket inparuk-at ni Hon. Judge Francisco R.D Quilala iti RTC Branch 14 ditoy ciudad ti Laoag gapo iti panaglabsing daytoy iti RA 10591.
Inlawlawag ni Tayaban a basar iti impormasyon ket maipagarop a miembro daytoy ti maysa a grupo ken adda ti iligal nga aktibidad na.
Naala dagiti otoridad iti balay ti maseknan ti maysa a caliber 38 ken lima a bala ti nadakamat a paltog.
Iti agdama ket adda iti kustudiyar ti PNP-Badoc ti lalaki ken maisagsaganan ti reklamo kontra kenkuana.
