LAOAG CITY- Balligi ti naiyuswat a search operation kontra iti maysa a mannalon iti Barangay Manalpac iti ili ti Solsona.
Segun kenni Police Captain Randy Damo, ti chief of police ti Philippine National Police Solsona, ti subject ti operasyon ket 47, mannalon ken residente iti nasao a barangay.
Inbatad ni Damo nga adda ti naawat da a report a ti suspek ket maipagarop nga agik-ikot ti paltog a mapapati a pangbutbuteng na isut gapo na nga inberipikar da agingga a naiyuswat ti operasyon.
Kabayatan ti operasyon ket nasukimat dagiti otoridad ti homemade caliber 45 ken 10 a bala na ken maysa a bala ti kalibre 38 a paltog ken maysa a magazine iti durabox nga adda iti kusina da.
Nagresistir pay ti suspek a maposasan gapo ta ipetpetteng na nga awan ti paltog na ken saan na a kukua ti naala iti balay na.
Patien ti suspek a naimula ti paltog ken balbala gapo ta idi rabii ket napan nakidungaw iti karruba da ken idi nagawiden ket nakalukaten ti pagtaengan da.
Mainaig iti daytoy, inbatad ni Kagawad Federico Gahir nga awan met ti rekord da iti barangay a makirirriri ti suspek malaksid laeng nga iti kallabes ket nagresponde gapo ta maipagarop nga inpupok ti maseknan ti asawa na.
Nupay kasta, naglikudan daytoy ti suspek gapo ta kayat na laeng a makasarita tapno maurnos ti pamilya da. Kabayatanna, mapilaan ti suspek ti panaglabsing iti Republic Act 10591 wenno Comprehensive Firearms and Ammunition Regulation Act of 2012.
