LAOAG CITY – Balligi ti naiyuswat a search warrant operation iti Brgy Maananteng iti ili ti Solsona.
Nabigbig ti subject ti operasyon a ni Pablo Clarence Pascual y Fabian, agtawen ti 53, maysa a mannalon ken residente iti nadakamat a barangay.
Ti search warrant ket inparuk-at ni Hon. Judge Jacinto Merin Dela Cruz Jr. iti RTC Branch 33, Bauang La Union gapo iti panaglabsing iti RA 10591.
Inpatungpal daytoy ti Solsona MPS kas lead unit kadua na ti PIU, INPPO, RIU1, PDEU, R2, 2nd PMFC ken RMFB1.
Nakumpiskar dagitoy otoridad ti maysa a replica ti caliber 45 nga addaan ti magazine; maysa nga hand grenade a nabungon ti face mask; lima a pidaso ti bala ti calibre 45 a paltog; maysa a kalibre 38 a paltog ken dua a bala na; maysa nga stainless Smith and Wesson caliber 38, ken 17 a pidaso ti bala ti kalibre 38 a paltog.
Iti agdama, dagiti nakumpiskar nga ebidensya ket adda iti kustudiyar ti PNP pakairamanan ti suspek para iti pannakaipila ti kaso kontra iti daytoy.
