LAOAG CITY – Balligi a natiliw ti maysa a tricycle driver iti naiyuswat nga entrapment operation iti Barangay 16, San Marcos iti ili ti San Nicolas.
Nabigbig daytoy a ni Reyquel Esta Samosam, agtawen ti 33, naasawaan, maysa a tricycle driver ken agkaskasera iti Barangay 7-B ditoy ciudad ti Laoag.
Nakumpiskar dagiti otoridad manipud kenni Samosam ti maysa a kalibre 38 a paltog, ken uppat a bala ti nasao a paltog, maysa a sachet ti maipagarop a napagango a bulong ti marijuana, dua a pidaso ti one thousand peso bill, dua a pares ti sapatos ken tallo a relo.
Mainaig iti daytoy, inbatad ni Samosam a manarimaan ti panagpasada na idi sinukon isuna ti anagan ti Andy Domingo nga agkaskasera iti ili ti San Nicolas.
Segun kenni Samosam, dumawdawat ni Domingo ti paggasolina na 150 a pisos ken apaman a naited na ti kwarta ken nagpakuyog ni Domingo a mapan da ilako ti sapatos no sadinno ket inkari ti maseknan nga ikkan na daytoy ti pang-boundary na a 400 a pisos.
Inlawlawag na nga apaman nga adda da iti Barangay 16 ket adda ti nangsada kadakuada nga otoridad a maipagarop a kellat a nangguyod, nangkugtar kenkuana, ken pinapakleb da daytoy.
Kuana nga idi nakapakleb isuna ket adda ti naipsuksok iti bulsa na.
Innayon na nga apaman a nairuar dagiti otoridad isuna manipud iti kotse ket dagus ket dagus a pinapanaw dagitoy ni Domingo.
Kabayatanna, inbatad ni Police Captain Ashley Cacayorin, ti Deputy Chief of Police iti ili ti San Nicolas a ni Samosam ket maibilang nga street level individual.
Inlawlawag ni Cacayorin a ti paltog ket ilako ni Samosam ngem inpetteng ti suspek a saan nga isuna t agilako no diket ni Domingo.
Sumango met ti kaso a panaglabsing iti Republic Act 10591 wenno Illegal Possession of Firearms and Ammunitions ken Republic Act 9165 wenno Comprehensive Dangerous Drugs Act of 2002.
Kinablaawan met ni Police Col. Julius Suriben, ti Provincial Director ti Ilocos Norte Police Provincial Office dagiti kameng ti PNP-San Nicolas iti balligi a pannakaiyuswat ti operation.
