LAOAG CITY – Positibo ti naiyuswat a search warrant operation iti Barangay 12 ditoy ciudad ti Laoag partikular iti apartment ni Mr. Lesther Galapon, maysa a pharmaceutical distributor ken tubo iti ili ti Bacarra.
Basar iti warrant nga in-issue ni RTC Judge ditoy ciudad, ti biruken dagiti otoridad ket kalibre 45 a paltog ken bala, ken glock caliber 9MM.
Nakita dagiti otoridad ti maysa a caliber 9MM a paltog, uppat a pidaso ti live ammunition iti cal. 60 nga addaan ti bullet chain, 21 a pidaso ti live ammunition ti cal. 45, maysa a wrapped cloth bag ti King Hard wheat flour nga addaan ti 35 a pidaso ti live ammunition ti cal. 45, tallo a pidaso ti live ammunition ti cal. 9mm, dua a pidaso ti live ammunition iti cal .22; 47 a pidaso ti empty cartridge shells ti cal. 9mm, maysa nga empty black bullet case, maysa a black Glock gun case nga addaan ti Glock Gen 17 Austria 9mm nga addaan ti tallo a magazines, maysa a magazine speed loader, maysa a gun cleaning kit, ken 18 a pidaso ti live ammunition ti cal. 9mm.
Inpetteng met ni Galapon nga awan ti ikot na a paltog no diket maipagarop a planted dagiti naala iti apartment na.
Maysa pay a kwinestyunaran ni Galapon ket ti pannaka-pugsat ti kable ti CCTV ken mapukpukaw ti memory card ken sakbay ti operasyon ket mayat pay laeng daytoy ken binigat na nga i-review.
Inlawlawag na a sakbay ti operasyon, adda isuna iti ruwar ken nakalukat ti ridaw ngem idi addan iti uneg ket nadlaw na a nakarikepen daytoy.
Inbatad na sakbay daytoy ket nakaawat ti subpoena gapo iti maipagarop a panagtakaw na ti babado ken alahas ditoy ciudad ti Laoag ken patien na nga adda ti koneksyon na daytoy iti operasyon.
Mainaig iti daytoy, kuna ni Police Lt. Col. Rafael Lero, ti chief of police ti PNP-Laoag a ti glock 17 a maysa kadagiti nakumpiskar ket maipagarop a kukua ti dati a live in partner ni Galapon.
Naamoan a ti live in partner ni Galapon ket isuna met laeng ti nangireklamo iti suspek a maipagarop a nagtakaw iti nagduduma a banag.
