LAOAG CITY – Nadismaya ti pamilia Marcos partikular ken ni 1st District Congressman Sandro Marcos, Presidente Ferdinand Marcos Jr. ken Sen. Imee Marcos gapu iti panagkiddaw ti lokal a gobierno ditoy siudad ti Laoag ti P1-B para iti kalsada nga agturong iti dakkel a mall a maar-aramid iti agdama.
Segun ken ni Marcos, nangipatulod ti lokal a gobierno ditoy siudad ti surat nga agkidkidaw ti pondo a mabingay iti P500 million manipud iti distrito ken P500 million manipud iti dakkel a mall.
Nupay kasta, kinunana a nagturong isuna iti Department of Public Works and Highways (DPWH) ken dinamagna daytoy a banag no sadinno naduktalan a P30 million laeng ti kasapulan para iti nasao a kalsada.
Inpaganetgetna a no saann daytoy bineripikar iti Department of Public Works and Highways ket masayang ti P500-M no sadinno mabalin pay daytoy a mausar para iti nagduduma a proyekto ti gobierno.
Kinunana a nasakit ti nakemna gapu ta ti ulitegna ti agdama a Mayor ti siudad a ni Mayor Micheal Marcos Keon.
Nupay kasta, kunana a saan laeng nga apelyido ti pakaibasaran no di ket ti kalidad ti pannakaipaay ti serbisio publiko.
Innayonna a dakkel ti panagtalek dagiti umili ditoy probinsia iti pamilia Marcos gapu iti tulong ken proyekto nga ipaayda.
