LAOAG CITY – Pabor a makiareglo ti pamilia ti biktima a pimmusay iti napasamak a desgrasia iti Brgy. 2, San Roque iti ili ti Paoay.
Daytoy ti inpakaammo ni Police Captain Sygman Benigno, ti Hepe iti Philippine National Police iti nasao nga ili.
Segun kenkuana, nabigbig ti biktima a residente ti Brgy. Oaig-Upay-Abulao iti ili ti Paoay idinto a taga probinsia ti Ilocos Sur ti nangiturong ti 10 wheeler Isuzu truck a nagkarga ti 16 a tonelada nga irik.
Inbatadna a basar iti insayangkatda nga imbestigasion, bayat a dumaldayasat ti 10 wheeler truck nga agturong nga agpa-abagatan ket ditoy a kellaat a dimmungpar ti biktima a nangiturong iti motorsiklo nga agturong met nga agpa-amianan.
Gapu iti kinapigsa ti impact ti desgrasia, kunana a naipit ken naipasirok iti akinkannawan a bumper iti 10 wheeler truck ti nakamotorsiklo a nangitunda ti panagsagabana ti nakana a sugat iti nagduduma a paset ti bagina.
Inlawlawagna a naitaray iti kaasitgan nga ospital ti biktima ngem pimmusay met laeng daytoy bayat a matamtaming.
Mainaig iti daytoy, inpakaammo ni Police Captain Benigno a maibilang nga accident prone area iti nakapasamakan ti insidente.
Innayonna a posible a nabartek ti biktima ngem iyur-urayda pay laeng ti resulta mismo ti liquor test daytoy.
Mainaig iti daytoy, manamnama a sumango ti kaso a reckless imprudence resulting to homicide kontra iti driver ti 10 wheeler truck.
Kabayatanna, naammoan nga agkasangay ti biktima idi mapasamak ti desgrasia nga isu met ti aldaw ti pannakatayna.
