LAOAG CITY – Maysa a pamilya iti Alabama ti naidiayaan ti libre a donuts iti uneg ti maysa a tawen kas panangbigbig da iti baby da a naipasngay iti parking lot ti Krispy Kreme bayat iti panag-snow na.
Segun ken ni Sha’nya Bennett, bayat iti panagturong da iti ospital kadwa na ti asawa na a ni Keon Mitchell ken ti anak da nga agtawen ti lima ket nangrugin nga agpasikal.
Kuna na a saan a basta makapataray iti lugan da ti asawa na gapu iti nabengbeng nga snow iti kalsada iti Dothan.
Inbatad ni Bennett nga agarop maysa pay a milya ti kaadayo manipod iti Flowers Hospital ken narikna na a saannan a kabaelan nga idanun ti bagina tapno isu iti pagpasngayan na.
Gapu iti daytoy, nagdesisyon da iti asawa na nga isardengen ti lugan da iti parking lot iti Krispy Kreme doughnut shop tapno isu ti pagpasngayan na.
Inadmitir dagiti agasawa a nakarikna da ti nakaro a buteng iti dayta a gundaway ngem nagbalin da a natibker kangrunaan na ni Bennett tapno agballigi a mangipasngay iti maikadwa a baby da.
Naamoan a kalpasan laeng ti panagpasngay ni Bennett ket dimteng dagiti emergency responders ken isudan ti nangikabil kadagiti agina iti Flowers Hospital.
Kalpasan ti pannakacheckup dagiti agina ket napalubusan da metlaeng a nagawid a dagus.
Malaksid iti pannakaidiaya ti libre a donut iti pamilya iti uneg ti maysa a tawen ket indiaya pay manager ti pasdek nga isudan to ti aghost para iti umuna a panagkasangay ti baby da.
