LAOAG CITY – Arig tagtagainep pay laeng para iti pamilia ni Police Officer 2 Omar Nacionales a maysa kadagiti natay nga Special Action Force wenno SAF 44 iti napasamak a Mamasapano massacre idiay Mamasapano, Maguindanao.
Daytoy ket uray maysan a dekada ti napalabasen sipod idi napapatay dagiti SAF troopers babaen iti panang-ambush kadakuada ti Moro Islamic Liberation Front militants.
Segun ken ni Mrs. Aleta Nacionales Tabullinar, kabsat ti pimmusay a ni PO2 Nacionales, agpapan iti daytoy a gundaway ket arig iyur-urayda pay laeng ti kabsatna nga agawid iti pagtaenganda.
Inbatadna a pudno a narigat a malipatan ti kabsatna iti baet ti naunday a panawen ti naglabasen gapu ta isuna ti maibilang a breadwinner iti pamiliada idi sibibiag pay laeng daytoy babaen iti panagpaadalna ti inaudida a kabsat.
Mainaig iti daytoy, sinaludaran ni P/Col. Frederick Obar, Provincial Director ti Ilocos Norte Police Provincial Office dagiti amin a SAF 44 gapu iti sakripisio ken kinaturedda a nakirinnupak uray ti bukudda a biag ti nagbalin a kasukat.
Kabayatanna, adda ti naiwayat a mass ken wreath laying ceremony iti Ilocos Norte Police Provincial Office kas pananglagip iti maika-10 a tawen a panangbigbig iti panagbalin a bannuar dagiti SAF 44.
Maipalagip a ni PO2 Omar Nacionales ket taga Barangay Escoda iti ili ti Marcos ken naitabon ti bangkayna idiay probinsia ti La Union nga isu ti nakaikamanganna.
