LAOAG CITY – Inpasingked ni Mayor Rommel Labasan iti ili a Pinili nga itultuloy da a papintasen iti nakaitaneman daydi maibilang a Queen of Philippine Horror Movie a ni Lilia Cuntapay iti Roman Catholic Cemetery iti ili a Pinili.
Naammoan a ni Mayor Labasan ti nangpadalus ken nangpapintan iti panteon daydi Lilia Cuntapay kas panagsagana iti Fiesta dagiti minatay inton Biernes.
Inbatad ti Mayor nga ituloyda a papintasen iti umay a tawen gapu ta saanda a naikamakam amin ita a Fiesta dagiti minatay kalpasan nga inkunsultarda met laeng daytoy iti anakna a ni Mr. Gilmore Cuntapay Sr. iti Barangay Tartarabang.
Basar iti plano, maiyaramidan ti ladawan ken maisurat ti dati a titulo ni Lilia Cuntapay a Queen of Philippine Horror Movie iti panteonna tapno makita ken malagipda ti langana a nagpabpabuya tunggal madanon iti Semana ti Ar-aria ditoy probinsia.
Inpakaammo ni Mayor Labasan a napanunotanda daytoy tapno maymayat met laeng a kitkitaen ken bisitaen dagiti adu a fans na malaksid kadagiti kameng ti pamilya na mangipatpateg kenkuana.
Inpalgakna a daytoy ket kas panangbigbig metten ti Gobierno Lokal ti Pinili ken ti Gobierno Probinsial iti liderato ni Gob. Matthew Marcos Manotoc ti dakkel a kontribusion ti maibilang a Queen of Philippine Horror Movie iti programa ti probinsia a Semana ti Ar-aria tunggal madanon iti Fiesta dagiti minatay.
Maipalagip a pimmusay ti Queen of Philippine Horror Movie idi Agusto 20, 2016 iti tawenna nga 86 ken naitabon ti bangkayna iti Roman Catholic Cemetery iti ili ti Pinili.
Kabayatan na, inpakaammo ni Mr. Gilmore Cuntapay Sr., agtawen ti 65 ken kakaisuna nga anak daydi dati a Queen of Philippine Horror Movie a kanayon nga adu dagiti mangbisbisita iti nakaitaneman ti inana tunggal madanon ti Fiesta dagiti minatay kas ipaneknek dagiti mabatbati a makmakan ken prutas iti panteonna.
Ni Cuntapay ti kanayon a maitampok ken bida iti Semana ti Ar-aria Festival nga inrugi a programa ni sigud a Gobernador nga itan ket Senador Imee Marcos idi tawen 2011.
